Local Nga Kagamhanan sa Bogo mipalit ug tulo ka bag-ong ambulansya.

Ang local nga kagamhanan ning Dakbayan sa Bogo bag-o lang gyud nga nakapalit ug 3 ka mga bag-ong ambulansya (Toyota HiAce Diesel Engine Ambulance).

 Nahiabot niadtong adlawng Biyernes ang tulo ang naasoy'ng mga ambulance gikan sa Toyota sa dakbayan sa Mandaue.

Kining pagpamalit sa maong mga sakyanan gitumong aron sa paghatag ug libreng serbisyo sa mga katawhan ning atong dakbayan pinaagi sa pagdala sa mga pasyente ngadto sa mga dagkung ospital sa dakbayan sa Sugbo ug ingun man sa pagtubag sa mga emergency. Libre kining maong mga ambulansya alang sa mga Bogohanon sumala sa gipamulong sa amahan ning dakyanan, Atty. Carlo Jose Martinez.

Human nga mahikay sa taga Toyota Motors ang pagparehistro niining maong mga ambulansya ngadto sa Land Transportation Office (LTO), ug human makakuhag mga driver nga momaneho niini, mosugod gyud dayon kini sa pag-alagad sa atong mga isig ka Bogohanon nga nagkinahanglan.

Kining hulagway gikan sa FB Page sa Local nga Kagamhanan ning Dakbayan sa Bogo,https://www.facebook.com/pg/lgubogo/

Pasundayag sa Bogo Barbecue Plaza

Nagmalampuson ang gipahigayon kaganinang kalingawan didto sa Bogo Barbecue Plaza.

Ang pasundayag kaganina naglangkob sa mga mananoyng awit bisaya, iningles ug tagalog sa mga mag-aawit ning atong dakbayan sa Bogo.

kining maong pasundayag bunga sa paningkamot sa talahurong Mayor ning atong dakbayan, Mayor Junie Martinez. Mao kini iyang panaad atol sa inagurasyon ug pag-abli pag-usab sa atong City of Bogo Barbecue Plaza niadtong Septembre 29.

Kon kahinumduman, ang mga gagmayng tindahan sa barbecue diha palibot sa Gaisano Bogo gipabalhin gayod ni Mayor Martinez sa usa na lamang ka lugar.Ug napilian niyang pagabalhinan mao ang kilid sa kanhiay Pards Hangout. Giabonohan ug daghang yuta kadtong nahisgotang lugar. Pipila ka bulan ang milabay, gisugdan ang pagpaanindot sa maong lugar. Gikan sa kasagaran ra kaayong bayhon sa usa ka pundok sa mga tindahan ug barbecue ngadto sa usa ka matahom kaayo nga barbecue plaza.

Anindot kaayo ang maong barbekyohan sanglit puno kini sa mga tanaman nga gituyo gayod pag-"landscape". gibutangan ug daghang mga suga ug usa ka igo-igo lang nga entablado sa tungatunga niini.

Matud pa sa Mayor niadtong miaging inagurasyon ning maong lugar, iyang paningkamotan nga adunay mga kalingawan o pasundayag didto sa barbekyo plasa matag ikaduha ug ikaupat nga sabado sa gabii sa matag bulan. Kini gimugna sa atong Mayor aron nga kitang mga Bogohanon adunay maanindot nga lugar nga kasuroyan diin pagasaw-an nato ang pagkaon uban sa atong mga higala ug mga kabanay samtang maminaw ug lingawon kita sa mga pasundayag ug mga kalingawan.

Ug bunga sa iyang paningkamot, gipasiugdahan kaganina ang usa ka hamubo apan makalingaw nga pasundayag sa mga siloy nga Bogohanon. Mao kadto ang ikaduhang sabado sa kalingawan sa atong barbekyo plaza.

Ang mga mipasundayag kaganina pulos mga empleyado sa kagamhanan sa dakbayan sa Bogo nga gilangkuban nila ni Henry Lequin, Henry Fernandez, Edu Fernandez, Antonio Sumbi ug ROchel Arong. Gipangulohan kini nila ni Mr. Slavsky Ybanez ug Mr. Christian Yurango

Karong umaabot nga ikaupat nga sabado, Oktubre 27 aduna na usab ipahigayon nga pasundayag sa samang lugar. Kini pagalangkuban sa nagkadaiyang mga sayaw nga salmotan ug pangulohan sa atong mga kabatan-onan sa barangay Nailon ug Gairan ning atong dakbayan.

Ug lagmit, karon umaabot Oktubre 31, mopahigayon na usab kita ug linain na usab nga pasundayag sanglit daghan man kaayong mga tawo nianang panahona nga mosuroy diha sa atong pantalan sa San Vicente.

Buhion ta ang atong pinulongan, Binisaya o Sugbuanon

Ania na kita niining moderno o binag-ong panahon. Dako kaayog kausaban ang kalibutan, dako na kaayo'g kalainan ang kagahapon ug karon.

Bisan gani ang mga kabataan kaniadto ug karon dako na kaayo ug kalainan. Ang mga bata kaniadto magdula-dula lang ug mga simpleng butang sa panimalay. Nahinumdum ning maong tagsulat sa iyang kabataan, dili pa kaayo kadto dugay kay human naman adtong panahona ang "Martial Law" diin mangita lang ug nilabay nang mga ligid sa bisikleta o motorsiklo aron himoong paligid. Niadtong panahona, nihit pa usab ang mga bisikleta ug motorsiklo mao nga kon aduna kay paligid, aw sikat na kaayo ka.

Apan lahi na karon ang mga kabataan, anaa na nag-atubang sa mga computer ug uban pang mga personal nga kahimanang binag-o nga gitawag sa iningles ug "gadgets". Kining maong nagkadaiyang mga binag-ong kahimanan mahimong makiglambigit sa ubang mga kahimanan nga dili nimo makita, gitawag kini sa ininglis ug internet connection. Kining internet daw usa ka kalibutan nga anaa ang tanan. kutob sa maabot sa hunahuna sa tawo makita nimo sa internet. Ang mga kabataan kaniadto gikinahanglan pang magpundok sa usa ka lugar aron magsangka sa nagkalainlaing mga dula. Apan karon pinaagi ning mga binag-ong kahimanan nga gitawag ug gadgets, mahimo ka nang makigsangka sa usa ka dula sa laing tawo pinaagi lamang sa internet.

Busa ang mga pamaagi sa pagbuhat sa atong mga gimbuhaton nagka moderno na usab samtang nagka moderno ang mga kagamitan ug mga butang sa palibot. Apan hinumduman nato nga bisan asa man kita dad-on ning atong pagbinag-o (modernisasyon), dili unta mahikalimtan sa hingpit ang atong kultura ug ang atong mga kagahapon.

Ang mga batan-on karon wala nay kalibutan sa mga panghitabo sa kagahapon ug sa akong tan-aw wala nay interes nga makisayod sa atong mga kagahapon ug kultura. Linga na kaayo ang mga kabataan sa mga kabag-ohan ning katilingban.

Tungod niining tanan, nahadlok kining tagsulat nga moabot ang panahon nga ang ato mismong pinulongang binisaya mapapas sa hingpit. Ang mga sinulat sa atong pinulongan makita nalang nato sa mga karaang mga libro nga isugnod nalang sa kalayo tungod kay wala nay buot pang mobasa niini. Ang mga sinulat sa atong pinulongan mao na lamang kadtong mga tamdanan ug mga giya diha sa mga kalihukan sa simbahan. Gani, ang bibliya ug mga basahon sa santos nga misa o sa uban pang mga tulumanon sa atong tinuohan nga sinulat sa bisaya nagsugod na pagka-usab. Bisan ang pulong nga atong gigamit sa adlaw adlaw nag anam na ug kausab. Gani adunay ubang mga pinulongan nga dili na binisaya apan gidawat ug gigamit na sa matag adlaw nga panagkukabildo nato makalinlang na sa mga batan-on ug nagtuo sila nga kini tiunay nga pulong binisaya apan hinukbit na diay kini sa mga modernong pinulongan.

Busa natawo kining maong balayan tungod kay buot natong magpadayon ang paggamit sa atong pinulongan. Ug nga magamit nato ang mga binag-ong kahimanan sama ning internet nga masabwag ug mapalambo nato ang atong pinulongang binisaya o sugbuanon. Daw sa makatuo gayud kita nga angayan gayud kitang mogamit ug makakat-on sa pinulungang Ingles kay mao ra kini ang paagi nga dili kita mabiyaan sa kabag-ohan o nga ang pinulungang Ingles mao lamang ang tulay alang sa kalamboan ug kabag-ohan. Daw sa hikalimtan nalang ang atong pinulongan sa ngalan sa kalamboan. Apan makita man usab nato nga adunay daghang mga nasud nga nagpabiling migamit sa ilang kaugalingong pinulongan nga nagmalamboon, gani mas malamboon ug mas moderno pa sila nga nasud nga migamit sa pinulongang ininglis. Pipili kanila nga migamit sa ilang kaugalingong pinulongan apan nagpabiling malamboon mao ang Germany, Rusia, Japan, China, Korea, Norway, Italy, France, ug uban pa.

Dili kini mahitungod sa pagbatok sa pinulongang Ingles, kondili, mahitungod kini sa pagpabiling buhi sa atong kaugalingong pinulongang binisaya o sugbuanon. Mahitungod kini sa pagluwas sa atong tinuod nga pinulongan nga nag-ong-ong na sa ganghaan sa kamatayon.

Bisan tuod kining tagsulat dili katitikanon sama kang Noy Tura Buenaventura ug labaw nang dili kaanib sa mga Ludabi nga sa akong tan-aw nagkahilis na usab, dili tuod lareno sa pinulungang Sugboanon sanglit gipakatawo man didto sa Mindanao, apan magpadayon kining tagsulat niining kawsa sa pagbuhi sa atong pinulongan.

Giawhag nako ang mga ludabi ug mga lareno na niining pinulongan nga inyo usab akong lamdagan sa mga sayop nga pulong akong magamit dinhi. Salamat sa inyong pagbasa karon, ug pagbulig sa umaabot.